IPL Final : 19ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ಟೂರ್ನಿ ಅಂತಿಮ ಘಟ್ಟ ತಲುಪಿದ್ದು, ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಇಂದು ಸಂಜೆ 7:30 ಗಂಟೆಗೆ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಗುಜರಾತ್ ಟೈಟಾನ್ಸ್ ಹಾಗೂ ಆರ್ಸಿಬಿ ತಂಡಗಳು ಪ್ರಶಸ್ತಿಗಾಗಿ ಕಾದಾಟ ನಡೆಸಲಿವೆ. ಈ ಮಧ್ಯೆ ವಿಜೇತ ಹಾಗೂ ರನ್ನರ್ಅಪ್ ತಂಡಗಳಿಗೆ ಸಿಗುವ ಬಹುಮಾನ ಮೊತ್ತದ ವಿವರ ಇಲ್ಲಿದೆ.
ಚಾಂಪಿಯನ್ ತಂಡಕ್ಕೆ ಸಿಗುವ ಬಹುಮಾನದ ಮೊತ್ತ ಎಷ್ಟು?
ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಐಪಿಎಲ್ 2026ರ ಬಹುಮಾನ ಮೊತ್ತಕ್ಕಾಗಿ ₹46.5 ಕೋಟಿಗೂ ಹೆಚ್ಚು ಹಣವನ್ನು ಮೀಸಲಿಟ್ಟಿದೆ. ಟೂರ್ನಿಯ ಚಾಂಪಿಯನ್ ಆಗುವ ತಂಡಕ್ಕೆ ₹20 ಕೋಟಿ ಬಹುಮಾನ ದೊರೆಯಲಿದೆ.
ರನ್ನರ್ಅಪ್ಗೆ ಸಿಗುವ ಬಹುಮಾನದ ಮೊತ್ತ ಎಷ್ಟು?
ಫೈನಲ್ನಲ್ಲಿ ಸೋಲುವ ತಂಡಕ್ಕೂ ಭರ್ಜರಿ ಬಹುಮಾನ ಲಭ್ಯವಾಗಲಿದೆ. ರನ್ನರ್ಅಪ್ ತಂಡಕ್ಕೆ ₹13 ಕೋಟಿ ನೀಡಲಾಗುತ್ತದೆ. ಜೊತೆಗೆ, ಟೂರ್ನಿಯಲ್ಲಿ ಮೂರನೇ ಸ್ಥಾನ ಪಡೆಯುವ ತಂಡಕ್ಕೆ ₹7 ಕೋಟಿ ಹಾಗೂ ನಾಲ್ಕನೇ ಸ್ಥಾನ ಪಡೆಯುವ ತಂಡಕ್ಕೆ ₹6.5 ಕೋಟಿ ಬಹುಮಾನ ನೀಡಲಾಗುತ್ತದೆ.
IPL ಬಹುಮಾನ ಮೊತ್ತದ ಬೆಳವಣಿಗೆ
IPL ಆರಂಭಿಕ ವರ್ಷಗಳಾದ 2008 ಮತ್ತು 2009ರಲ್ಲಿ ಚಾಂಪಿಯನ್ ತಂಡಕ್ಕೆ ₹4.8 ಕೋಟಿ ಮಾತ್ರ ಬಹುಮಾನ ನೀಡಲಾಗುತ್ತಿತ್ತು.
ನಂತರ ವರ್ಷದಿಂದ ವರ್ಷಕ್ಕೆ ಈ ಮೊತ್ತ ಹೆಚ್ಚಳಗೊಂಡು ಈಗ ₹20 ಕೋಟಿಗೆ ತಲುಪಿದೆ. ಕೋವಿಡ್-19 ಸಾಂಕ್ರಾಮಿಕದ ಪರಿಣಾಮವಾಗಿ 2020ರಲ್ಲಿ ಮಾತ್ರ ಬಹುಮಾನ ಮೊತ್ತವನ್ನು ₹10 ಕೋಟಿಗೆ ಇಳಿಸಲಾಗಿತ್ತು.
ಟಾಪ್-4 ತಂಡಗಳಿಗೆ ಮಾತ್ರ ನಗದು ಬಹುಮಾನ
ಐಪಿಎಲ್ನಲ್ಲಿ ಮೊದಲ ನಾಲ್ಕು ಸ್ಥಾನಗಳಲ್ಲಿರುವ ತಂಡಗಳಿಗೆ ಮಾತ್ರ ಅಧಿಕೃತ ನಗದು ಬಹುಮಾನ ನೀಡಲಾಗುತ್ತದೆ. ಐದನೇ ಸ್ಥಾನದಿಂದ ಹತ್ತನೇ ಸ್ಥಾನದವರೆಗೆ ಮುಗಿಸುವ ತಂಡಗಳಿಗೆ ಯಾವುದೇ ಬಹುಮಾನ ಹಣ ಇರುವುದಿಲ್ಲ.
ಆದಾಗ್ಯೂ, ಪ್ರಾಯೋಜಕತ್ವ, ಟಿಕೆಟ್ ಮಾರಾಟ ಹಾಗೂ ಪ್ರಸಾರ ಹಕ್ಕುಗಳ ಮೂಲಕ ಫ್ರಾಂಚೈಸಿಗಳು ಆದಾಯ ಗಳಿಸುತ್ತವೆ.
ಬಹುಮಾನ ಹಂಚಿಕೆ ಹೇಗೆ?
ಐಪಿಎಲ್ ನಿಯಮಾವಳಿಗಳ ಪ್ರಕಾರ, ತಂಡಕ್ಕೆ ಸಿಗುವ ಬಹುಮಾನ ಮೊತ್ತದ 50 ಶೇಕಡಾವನ್ನು ಆಟಗಾರರ ನಡುವೆ ಹಂಚಲಾಗುತ್ತದೆ. ಉಳಿದ 50 ಶೇಕಡಾ ಮೊತ್ತ ಫ್ರಾಂಚೈಸಿ ಮಾಲೀಕರಿಗೆ ಸೇರುತ್ತದೆ.
ಇದನ್ನು ಓದಿ : IPL 2026 : ಫೈನಲ್ ಟಿಕೆಟ್ಗಾಗಿ ಇಂದು GT – RR ಮಹಾಯುದ್ಧ
ವೈಯಕ್ತಿಕ ಪ್ರಶಸ್ತಿಗಳಿಗೂ ನಗದು ಬಹುಮಾನ
ಟೂರ್ನಿಯಲ್ಲಿ ಅತ್ಯಧಿಕ ರನ್ ಗಳಿಸಿದ ಆಟಗಾರನಿಗೆ ನೀಡುವ ಆರೆಂಜ್ ಕ್ಯಾಪ್ ಹಾಗೂ ಅತ್ಯಧಿಕ ವಿಕೆಟ್ ಪಡೆದ ಬೌಲರ್ಗೆ ನೀಡುವ ಪರ್ಪಲ್ ಕ್ಯಾಪ್ ಸೇರಿದಂತೆ ವಿವಿಧ ವೈಯಕ್ತಿಕ ಪ್ರಶಸ್ತಿಗಳ ವಿಜೇತರಿಗೆ ಹೆಚ್ಚುವರಿ ನಗದು ಬಹುಮಾನ ದೊರೆಯುತ್ತದೆ.
ಈ ಪ್ರಶಸ್ತಿಗಳ ಮೂಲಕ ಆಟಗಾರರು ಸುಮಾರು ₹1 ಕೋಟಿವರೆಗೆ ಹೆಚ್ಚುವರಿ ಮೊತ್ತ ಗಳಿಸುವ ಅವಕಾಶ ಹೊಂದಿರುತ್ತಾರೆ.
ಇನ್ನು ಐಪಿಎಲ್ 2026ರ ಫೈನಲ್ ಕಾದಾಟದಲ್ಲಿ ಯಾರು ಚಾಂಪಿಯನ್ ಆಗುತ್ತಾರೆ ಎಂಬುದರ ಬಗ್ಗೆ ಕ್ರಿಕೆಟ್ ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
About the Author
