Lokayukta Raid : ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಕಚೇರಿಯ ಮೇಲೆ ದಿಡೀರ್ ದಾಳಿ ನಡೆಸಿದ್ದಾರೆ.
ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಕಚೇರಿಯ ಮೇಲೆ ಲೋಕಾಯುಕ್ತ ಅಧಿಕಾರಿಗಳು ದಾಳಿ (Lokayukta Raid) ನಡೆಸಿದ್ದಾರೆ. ಕಾರ್ಪೋರೇಷನ್ ಸರ್ಕಲ್ ಬಳಿ ಇರುವ ಟಿವಿಸಿಸಿ (Town and Village Coordination Cell) ಕಚೇರಿಯ ಮೇಲಿನ ದಾಳಿಯಿಂದ ಅಧಿಕಾರಿಗಳ ವಲಯದಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಗಿದೆ.
ನಗರದ ವಿವಿಧ ಕಚೇರಿಗಳಲ್ಲೂ ಶೋಧ ಕಾರ್ಯಾಚರಣೆ
ಲೋಕಾಯುಕ್ತದ ಈ ಕ್ರಮದಲ್ಲಿ ದಕ್ಷಿಣ, ಉತ್ತರ ಹಾಗೂ ಪಶ್ಚಿಮ ನಗರ ಪಾಲಿಕೆಗಳ ಕಚೇರಿಗಳಲ್ಲೂ ಶೋಧ ಕಾರ್ಯಾಚರಣೆ ನಡೆಯುತ್ತಿದೆ. ಅಲ್ಲದೆ, ಲೋಕಾಯುಕ್ತ ತಂಡವು ಏಳು ವಿಭಿನ್ನ ಸ್ಥಳಗಳಲ್ಲಿ ನಗರ ಪಾಲಿಕೆ ಇಂಜಿನಿಯರ್ಗಳ ನಿವಾಸಗಳ ಮೇಲೂ ದಾಳಿ ನಡೆಸಿದೆ.
ಈ ಇಂಜಿನಿಯರ್ಗಳು ಆರ್.ಆರ್. ನಗರ ಮತ್ತು ಪಶ್ಚಿಮ ವಲಯದ ಕಾಮಗಾರಿಗಳಿಗೆ ಸಂಬಂಧಪಟ್ಟವರಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಐದು ಸದಸ್ಯರ ಲೋಕಾಯುಕ್ತ ತಂಡದ ದಾಳಿ
ಲೋಕಾಯುಕ್ತ ಇನ್ಸ್ಪೆಕ್ಟರ್ ಗೋವಿಂದರಾಜು ನೇತೃತ್ವದ ಐದು ಸದಸ್ಯರ ತಂಡ ಈ ದಾಳಿಯನ್ನು ನಡೆಸಿದ್ದು, ಶಂಕಿತ ಕಡತಗಳ ಸಂಪೂರ್ಣ ಪರಿಶೀಲನೆಗೆ ಕೈ ಹಾಕಿದೆ.
ಮೂಲಗಳ ಪ್ರಕಾರ, ಈ ದಾಳಿ ಆರ್.ಆರ್. ನಗರ ವ್ಯಾಪ್ತಿಯ 126 ಕಾಮಗಾರಿಗಳ ಕುರಿತು ಬಂದಿದ್ದ ದೂರುಗಳ ಹಿನ್ನೆಲೆಯಲ್ಲಿ ನಡೆದಿದೆ.
ವರದಿ ದಾಖಲೆಗಳಲ್ಲಿ ವ್ಯತ್ಯಾಸ – ಕಾಗದದಲ್ಲೇ ಪೂರ್ಣಗೊಂಡ ಕಾಮಗಾರಿಗಳು!
ದೂರಿನಲ್ಲಿ, ಕಾಮಗಾರಿಗಳ ಪ್ರಮಾಣ ಮತ್ತು ವರದಿ ದಾಖಲೆಗಳಲ್ಲಿ ದೊಡ್ಡ ವ್ಯತ್ಯಾಸವಿದೆ. ಕೆಲವು ಕಾಮಗಾರಿಗಳು ಕಾಗದದಲ್ಲೇ ಪೂರ್ಣಗೊಂಡಂತೆ ತೋರಿಸಲ್ಪಟ್ಟಿದ್ದು, ವಾಸ್ತವದಲ್ಲಿ ಅವು ಅಪೂರ್ಣವಾಗಿವೆ ಎಂಬ ಆರೋಪಗಳು ಕೇಳಿ ಬಂದಿವೆ.
ಈ ಹಿನ್ನೆಲೆಯಲ್ಲಿ ಲೋಕಾಯುಕ್ತ ತಂಡವು ಜಿಬಿಎ ಕಚೇರಿಗೆ ನುಗ್ಗಿ, ಯೋಜನೆಗೆ ಸಂಬಂಧಿಸಿದ ಎಲ್ಲ ಕಡತಗಳು, ಟೆಂಡರ್ ದಾಖಲೆಗಳು ಹಾಗೂ ಪಾವತಿ ವಿವರಗಳನ್ನು ಪರಿಶೀಲಿಸುತ್ತಿದೆ.
ಇದನ್ನು ನೋಡಿ : Bjp Tweet: ಕಾಂಗ್ರೆಸ್ 420 ಕೋಡ್ ಬಳಿಸಿ ಪರಪ್ಪನ ಅಗ್ರಹಾರದಲ್ಲಿ ವಿಶೇಷ ರಿಯಾಯಿತಿ ಪಡೆಯಿರಿ, ಹಾಸ್ಯಾತ್ಮಕ ಟೋನ್ನಲ್ಲಿ ಕೈ ಟೀಕಿಸಿದ ಬಿಜೆಪಿ
ಕಡತ ಹಸ್ತಾಂತರಕ್ಕೆ ವಿರೋಧ – ಸಿಸಿಟಿವಿ ದೃಶ್ಯ ವಶಪಡಿಸಿಕೊಂಡರು
ದಾಳಿಯ ಸಮಯದಲ್ಲಿ ಲೋಕಾಯುಕ್ತ ಅಧಿಕಾರಿಗಳು ಎಲ್ಲಾ ಪ್ರಮುಖ ದಾಖಲೆಗಳನ್ನು ವಶಪಡಿಸಿಕೊಂಡಿದ್ದು, ಕಚೇರಿಯ ಸಿಸಿಟಿವಿ ದೃಶ್ಯಗಳನ್ನೂ ಸಂಗ್ರಹಿಸಿದ್ದಾರೆ.
ಇನ್ನು ಸಂಗ್ರಹಿಸಿದ ಮಾಹಿತಿಯನ್ನು ವಿಶ್ಲೇಷಿಸಿ ಮುಂದಿನ ಕಾನೂನು ಕ್ರಮ ಕೈಗೊಳ್ಳಲು ಸಿದ್ಧತೆ ನಡೆಯುತ್ತಿದೆ.
ಕಳಪೆ ಕಾಮಗಾರಿಯ ಜೊತೆಗೆ ಪಾವತಿಯಲ್ಲಿ ಅಕ್ರಮ ಶಂಕೆ
ಮೂಲಗಳ ಪ್ರಕಾರ, ಲೋಕಾಯುಕ್ತವು ಕಳಪೆ ಕಾಮಗಾರಿ ಮತ್ತು ಪಾವತಿಯಲ್ಲಿ ಅಕ್ರಮ ಎಂಬ ಎರಡು ಅಂಶಗಳ ಕುರಿತು ತನಿಖೆ ಆರಂಭಿಸಿದೆ. ಮೇಲ್ಮಟ್ಟಕ್ಕೆ ಕಳಪೆ ಕಾಮಗಾರಿ ಮುಖ್ಯ ಸಮಸ್ಯೆಯಾದರೂ, ಪಾವತಿಯಲ್ಲಿ ಭಾರೀ ಅಕ್ರಮ ನಡೆದಿದೆ ಎಂಬ ಶಂಕೆ ವ್ಯಕ್ತವಾಗಿದೆ.
ಲೋಕಾಯುಕ್ತ ಇನ್ಸ್ಪೆಕ್ಟರ್ ಗೋವಿಂದರಾಜು ಅವರ ಪ್ರತಿಕ್ರಿಯೆ
ಇನ್ನು ಮಾಧ್ಯಮದೊಂದಿಗೆ ಮಾತನಾಡಿದ ಗೋವಿಂದರಾಜು ಅವರು, “ಕಚೇರಿಯಿಂದ ಪಡೆದ ದಾಖಲೆಗಳ ಆಧಾರದ ಮೇಲೆ ಪ್ರಾಥಮಿಕ ತನಿಖೆ ನಡೆಯಲಿದೆ.
ಯಾವುದೇ ಅಧಿಕಾರಿಯು ಅಕ್ರಮದಲ್ಲಿ ತೊಡಗಿಕೊಂಡಿರುವುದು ದೃಢಪಟ್ಟರೆ ಕಾನೂನು ಕ್ರಮ ತಪ್ಪದು,” ಎಂದು ಹೇಳಿದ್ದಾರೆ.
ಜಿಬಿಎ ಕಚೇರಿ ಹಾಗೂ ಇಂಜಿನಿಯರ್ಗಳ ವಿರುದ್ಧ ನಡೆಯುತ್ತಿರುವ ಈ ತನಿಖೆ ನಗರದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಲೋಕಾಯುಕ್ತರಿಂದ ಪ್ರಾರಂಭವಾದ ಈ ದಾಳಿ ನಗರ ಪಾಲಿಕೆಯ ಕಾಮಗಾರಿಗಳ ಅಕ್ರಮ ಮತ್ತು ಭ್ರಷ್ಟಾಚಾರದ ವಿರುದ್ಧದ ಪ್ರಮುಖ ಕ್ರಮವೆಂದು ಪರಿಗಣಿಸಲಾಗಿದೆ.
ಇದನ್ನು ಓದಿ : Gold Price Today : ಚಿನ್ನದ ದರದಲ್ಲಿ ಭಾರೀ ಏರಿಕೆ
About the Author
