KGF 3 ಸಿನಿಮಾ ಯಾವಾಗ ಬರುತ್ತದೆ ಎಂಬ ಪ್ರಶ್ನೆಗೆ ನಟ ಯಶ್ ಸ್ಪಷ್ಟನೆ ನೀಡಿದ್ದಾರೆ. ಟಾಕ್ಸಿಕ್ ಮತ್ತು ರಾಮಾಯಣ ಸಿನಿಮಾಗಳ ಬಳಿಕ ಮಾತ್ರ ಕೆಜಿಎಫ್ 3 ನಿರ್ಮಾಣವಾಗಲಿದೆ ಎಂದು ಹೇಳಿದ್ದಾರೆ.
ಕನ್ನಡ ಚಿತ್ರರಂಗದ ರಾಕಿಂಗ್ ಸ್ಟಾರ್ ಯಶ್ ನಟಿಸಿರುವ ‘ಟಾಕ್ಸಿಕ್’ ಮತ್ತು ‘ರಾಮಾಯಣ’ ಸಿನಿಮಾಗಳು ಈ ವರ್ಷ ಬಹು ನಿರೀಕ್ಷಿತ ಚಿತ್ರಗಳಾಗಿ ಗುರುತಿಸಿಕೊಂಡಿವೆ.
ಇದರ ಜೊತೆಗೆ, ಅವರ ಅಭಿಮಾನಿಗಳಲ್ಲಿ ಸದಾ ಕೇಳಿಬರುವ ಪ್ರಮುಖ ಪ್ರಶ್ನೆ ಎಂದರೆ — ‘KGF 3 ’ ಸಿನಿಮಾ ಯಾವಾಗ ಬರುತ್ತದೆ?
ಇತ್ತೀಚೆಗೆ ಈ ಪ್ರಶ್ನೆಗೆ ಸ್ವತಃ ಯಶ್ ಉತ್ತರ ನೀಡಿದ್ದು, ‘ಕೆಜಿಎಫ್: ಚಾಪ್ಟರ್ 3’ ಖಂಡಿತವಾಗಿಯೂ ನಿರ್ಮಾಣವಾಗುತ್ತದೆ ಎಂದು ಭರವಸೆ ನೀಡಿದ್ದಾರೆ.
ಆದರೆ, ಅದು ತಕ್ಷಣದ ಭವಿಷ್ಯದಲ್ಲಿ ಸಾಧ್ಯವಿಲ್ಲ ಎಂಬುದನ್ನೂ ಸ್ಪಷ್ಟಪಡಿಸಿದ್ದಾರೆ.
ಪ್ರಸ್ತುತ ಯಶ್ ತಮ್ಮ ಮುಂಬರುವ ಚಿತ್ರಗಳಾದ ‘ಟಾಕ್ಸಿಕ್’, ನಿರ್ದೇಶಕ ನಿತೇಶ್ ತಿವಾರಿ ಅವರ ‘ರಾಮಾಯಣ’ ಮತ್ತು ಅದರ ಮುಂದುವರಿದ ಭಾಗವಾದ ‘ರಾಮಾಯಣ 2’ ಸಿನಿಮಾಗಳ ಮೇಲೆ ಸಂಪೂರ್ಣ ಗಮನ ಹರಿಸಿದ್ದಾರೆ.
ಇದರಿಂದಾಗಿ, ಅವರು ಸದ್ಯಕ್ಕೆ ‘ಕೆಜಿಎಫ್ 3’ ಕುರಿತು ಯಾವುದೇ ತುರ್ತು ಯೋಜನೆ ಇಲ್ಲ ಎಂದು ತಿಳಿಸಿದ್ದಾರೆ.
ಆದರೆ, ನಿರ್ದೇಶಕ ಪ್ರಶಾಂತ್ ನೀಲ್ ಜೊತೆ ಹೊಸ ಕಥೆ ಮತ್ತು ಐಡಿಯಾಗಳ ಬಗ್ಗೆ ಚರ್ಚೆ ನಡೆಯುತ್ತಲೇ ಇರುತ್ತದೆ ಎಂದು ಹೇಳಿದ್ದಾರೆ.
“ಹಣಕ್ಕಾಗಿ ಅಲ್ಲ, ಉತ್ತಮ ಕಥೆಗಾಗಿ ಮಾತ್ರ ಸಿನಿಮಾ” – ಯಶ್
ಯಶ್ ಸ್ಪಷ್ಟವಾಗಿ ಹೇಳಿದ್ದು , ಪ್ರೇಕ್ಷಕರು ನಮಗೆ ನೀಡಿರುವ ಪ್ರೀತಿಗೆ ತಕ್ಕಂತೆ, ಅವರಿಗೆ ಹೆಮ್ಮೆ ಪಡುವಂತಹ ಅದ್ಭುತ ಕಥೆ ಸಿದ್ಧವಾದಾಗ ಮಾತ್ರ ‘ಕೆಜಿಎಫ್ 3’ ಸಿನಿಮಾ ಕೈಗೆತ್ತಿಕೊಳ್ಳಲಾಗುತ್ತದೆ.
ಕೇವಲ ಹಣ ಮಾಡುವ ಉದ್ದೇಶದಿಂದ ಈ ಸಿನಿಮಾ ಮಾಡುವುದಿಲ್ಲ ಎಂಬುದು ಅವರ ನಿಲುವು.
ಇದರಿಂದ, ಚಿತ್ರಮಂದಿರಗಳಲ್ಲಿ ಮತ್ತೆ ‘ರಾಕಿ ಭಾಯಿ’ ಅಬ್ಬರಿಸಲು ಇನ್ನೂ ಸಮಯ ಬೇಕು ಎಂಬುದು ಸ್ಪಷ್ಟವಾಗಿದೆ.
‘ಕೆಜಿಎಫ್’ ಸರಣಿಯ ಯಶಸ್ಸು
‘ಕೆಜಿಎಫ್’ ಮತ್ತು ‘ಕೆಜಿಎಫ್ 2’ ಸಿನಿಮಾಗಳು ಯಶ್ ಅವರನ್ನು ಪ್ಯಾನ್ ಇಂಡಿಯಾ ಸೂಪರ್ ಸ್ಟಾರ್ ಆಗಿ ಮಾಡಿದ್ದಷ್ಟೇ ಅಲ್ಲ, ಕನ್ನಡ ಚಿತ್ರರಂಗವನ್ನು ವಿಶ್ವ ಮಟ್ಟದಲ್ಲಿ ಗುರುತಿಸಿಸಿದ ಪ್ರಮುಖ ಸಿನಿಮಾಗಳಾಗಿವೆ.
ಇದಲ್ಲದೆ, ‘ಕೆಜಿಎಫ್ 2’ ಸಿನಿಮಾದ ಅಂತ್ಯದಲ್ಲಿ ಕಥೆ ಮುಂದುವರೆಯುವ ಸುಳಿವು ನೀಡಲಾಗಿತ್ತು.
ಆದ್ದರಿಂದ ಕಳೆದ ಕೆಲವು ವರ್ಷಗಳಿಂದಲೂ ಅಭಿಮಾನಿಗಳು ‘ಕೆಜಿಎಫ್ 3’ ಬಗ್ಗೆ ನಿರಂತರವಾಗಿ ಕಾಯುತ್ತಿದ್ದಾರೆ.
About the Author
