MOVIE : ಧನುಷ್ – ರಶ್ಮಿಕಾ ಅಭಿನಯದ ‘ಕುಬೇರ’ ಸಿನಿಮಾದ ಟೀಸರ್ ರಿಲೀಸ್

ಸಿನಿಮಾ : ಪ್ರಸಿದ್ಧ ತಮಿಳು ನಟ ಧನುಷ್ ಹಾಗೂ ನಾಷನಲ್‌ ಕ್ರಷ್ ರಶ್ಮಿಕಾ ಮಂದಣ್ಣ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿರುವ ಬಹುಭಾಷಾ ಚಿತ್ರ ಕುಬೇರ ಸಿನಿಮಾದ ಟೀಸರ್ ಇದೀಗ ಬಿಡುಗಡೆಯಾಗಿ, ಸಿನಿಪ್ರೇಮಿಗಳ ಗಮನ ಸೆಳೆದಿದೆ. ಈ ಚಿತ್ರವನ್ನು ಫಿದಾ, ಲವ್ ಸ್ಟೋರಿ ಖ್ಯಾತಿಯ ನಿರ್ದೇಶಕ ಶೇಖರ್ ಕಮ್ಮುಲಾ ನಿರ್ದೇಶಿಸಿದ್ದಾರೆ. ಹಣ ಮತ್ತು ಶ್ರೀಮಂತ ವ್ಯಕ್ತಿಯ ಕಥೆಯನ್ನು ಈ ಸಿನಿಮಾ ಹೇಳುತ್ತದೆ. 

ಟೀಸರ್‌ನಲ್ಲಿ ಧನುಷ್ ವೇಷಭೂಷಣವಲ್ಲದ ಭಿಕ್ಷುಕನಾಗಿ, ಉದ್ದನೆಯ ಗಡ್ಡ, ಹರಿದ ಬಟ್ಟೆಗಳಿಂದಾಗಿ ವಿಭಿನ್ನ ಲುಕ್‌ನಲ್ಲಿ ಕಾಣಿಸಿಕೊಂಡಿ ದ್ದಾರೆ. ಇನ್ನೊಂದೆಡೆ, ರಶ್ಮಿಕಾ ಮಿಡಲ್ ಕ್ಲಾಸ್ ಹುಡುಗಿಯ ವೇಷದಲ್ಲಿ ತಮ್ಮ ನೈಸರ್ಗಿಕ ಅಭಿನಯದಿಂದ ಮನಸೆಳೆಯುತ್ತಿದ್ದಾರೆ.

ಹಣದ ಮಹತ್ವ, ಅದರ ಮೇಲೆ ಇರುವ ಮನುಷ್ಯನ ಆಸೆ ಹಾಗೂ ಅದರ ಪರಿಣಾಮಗಳನ್ನು ಈ ಟೀಸರ್ ಸಂಗೀತದ ಮೂಲಕ ಪ್ರತಿಬಿಂಬಿಸಿದೆ. ದುಡ್ಡೇ ಹೈಲೆಟ್ ಆಗಿದ್ದು, ಟೀಸರ್ ಹಾಡಿನ ರೂಪದಲ್ಲಿ ತೋರಿಸಲಾಗಿದೆ. ಕನ್ನಡ ಟೀಸರ್‌ನಲ್ಲಿ ‘ನಂದು ನಂದು ನನ್ನದೇ ಈ ಲೋಕವಯ್ಯ’ ಎಂಬ ಹಾಡಿನ ಸಾಲು ಪ್ರೇಕ್ಷಕರ ಗಮನ ಸೆಳೆದಿದೆ.

ಇನ್ನು ಕುಬೇರ ಚಿತ್ರದಲ್ಲಿ ನಾಗರ್ಜುನ ಅಕ್ಕಿನೇನಿ ಶ್ರೀಮಂತ ವ್ಯಕ್ತಿಯಾಗಿ ಪ್ರಭಾವಶಾಲಿ ಪಾತ್ರದಲ್ಲಿ ಬಿಂಬಿಸಿದ್ದಾರೆ. ಬಹುಭಾಷಾ ರೂಪದಲ್ಲಿ ತಯಾರಾಗಿರುವ ಈ ಚಿತ್ರ ತಮಿಳು, ಕನ್ನಡ, ತೆಲುಗು ಸೇರಿದಂತೆ ಹಲವು ಭಾಷೆಗಳಲ್ಲಿ ಬಿಡುಗಡೆ ಆಗುತ್ತಿದೆ. ಇದೇ ಜೂನ್ 20ರಂದು ಚಿತ್ರ ರಿಲೀಸ್ ಆಗಲಿದೆ. ಧನುಷ್, ರಶ್ಮಿಕಾ, ನಾಗರ್ಜುನ ತ್ರಯದ ಈ ಅಪರೂಪದ ಸಂಯೋಜನೆ ಹಾಗೂ ಶೇಖರ್ ಕಮ್ಮುಲಾರ ಕಥಾನಕದ ಛಾಯಾ ಈ ಚಿತ್ರವನ್ನು ದೊಡ್ಡ ನಿರೀಕ್ಷೆಯಲ್ಲಿರಿಸಿದೆ. ಇನ್ನು ಚಿತ್ರದ ಟೀಸರ್ ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೆಂಡ್ ಆಗುತ್ತಿದೆ.