ಉತ್ತರ ಕನ್ನಡ :

ಉತ್ತರ ಕರ್ನಾಟಕದ ಎಂದೊಡನೆ ಮೊದಲು ನೆನಪಾಗುವುದೇ ಖಡಕ್ ಜೋಳದ ರೊಟ್ಟಿ. ಜೋಳದ ರೊಟ್ಟಿಗೆ, ಪುಡಿ ಚಟ್ನಿ, ಮೊಸರು, ಅಡುಗೆ ಎಣ್ಣೆ ಜೊತೆಗೆ ನೆಚ್ಚಿಕೊಂಡು ತಿಂದ್ರೆ ಹೊಟ್ಟೆಗೆ ಸಂತೃಪ್ತಿ. ಆದರೆ ಈ ಬಿಸಿ ಬಿಸಿ ರೊಟ್ಟಿಯಿಂದ ಮಾಡುವ ಮುಟಿಗಿಯಂತೂ ಈ ಭಾಗದಲ್ಲಿ ತುಂಬಾನೇ ಪ್ರಸಿದ್ಧ. ಮಸಾಲೆಯನ್ನು ಸೇರಿಸಿ ಮುಟಿಗಿ ಮಾಡಲು ಕೆಲವೇ ಕೆಲವು ಐಟಂಗಳಿದ್ದರೆ ಸಾಕು, ಈ ರೆಸಿಪಿ ಮಾಡೋದು ಹೇಗೆ ಎನ್ನುವುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.

ನಾವೆಲ್ಲಾ ಬೆಳಗ್ಗೆ ತಿಂಡಿಗೆ ಇಡ್ಲಿ, ದೋಸೆ, ಕಡುಬು ತಿಂದು ಅಭ್ಯಾಸ. ಆದರೆ ಉತ್ತರ ಕರ್ನಾಟಕದ ಮಂದಿಗೆ ಜೋಳದ ರೊಟ್ಟಿಯೇ ಗಟ್ಟಿ ಆಹಾರ. ಬೆಳಗ್ಗೆ ಒಂದೆರಡು ಖಡಕ್ ರೊಟ್ಟಿ ಜೊತೆಗೆ ಚಟ್ನಿಯೋ ಒಣಖಾರನೋ ಹಾಕಿ ತಿಂದರೆ ಹೊಟ್ಟೆ ಗಟ್ಟಿಯಾಗುತ್ತದೆ. ಹೀಗಾಗಿ ಉತ್ತರ ಕರ್ನಾಟಕದ ರೈತರು ರೊಟ್ಟಿ ತಿಂದೇ ಹೊಲದ ಕಡೆಗೆ ತೆರಳುತ್ತಾರೆ. ಹೀಗಾಗಿ ಆ ಭಾಗದಲ್ಲಿ ಬೆಳಗ್ಗೆ ಹಾಗೂ ಸಂಜೆಯ ವೇಳೆ ರೊಟ್ಟಿ ತಟ್ಟುವ ಶಬ್ದ ಕೇಳುವುದೇ ಕಿವಿಗೆ ಆನಂದ. ಆದರೆ ಈ ರೊಟ್ಟಿಯಿಂದ ಮುಟಿಗಿ ಎನ್ನುವ ವಿಶೇಷ ಖಾದ್ಯವನ್ನು ಮಾಡಬಹುದು ಎನ್ನುವುದು ಬಹುತೇಕರಿಗೆ ತಿಳಿದಿಲ್ಲ. ಮಸಾಲೆಯನ್ನು ಸೇರಿಸಿ ತಯಾರಿಸಿದ ಇದನ್ನು ಸಂಜೆಯ ವೇಳೆ ಸವಿಯಬಹುದು. ಈ ಭಾಗದ ಫೇಮಸ್ ಖಾದ್ಯವಾಗಿರುವ ಜೋಳದ ರೊಟ್ಟಿ ಮುಟಿಗಿಯನ್ನು ಮಾಡುವುದು ಸುಲಭ ರುಚಿಯು ಕೂಡ ಅಷ್ಟೇ ಅದ್ಭುತವಾಗಿರುತ್ತದೆ

ಜೋಳದ ರೊಟ್ಟಿ ಮುಟಿಗಿ  ಮಾಡಲು ಬೇಕಾಗುವ ಸಾಮಾಗ್ರಿಗಳು:                                                                                    ಜೋಳದ ರೊಟ್ಟಿ , ಮೂರರಿಂದ ನಾಲ್ಕು ಸ್ಪೂನ್‌ ತುಪ್ಪ, ಐದರಿಂದ ಆರು ಬೆಳ್ಳುಳ್ಳಿ ಎಸಳು, ಜೀರಿಗೆ ಹಾಗೂ ಒಂದೆರಡು ಚಮಚ ಒಣಖಾರದ ಪುಡಿ , ರುಚಿಗೆ ತಕ್ಕಷ್ಟು ಉಪ್ಪು, ಈರುಳ್ಳಿ ಅರ್ಧ ಸ್ಪೂನ್, ಕೊತ್ತಂಬರಿ ಸೊಪ್ಪು ಮತ್ತು ಸ್ವಲ್ಪ ಸಣ್ಣಕೆ ಹೆಚ್ಚಿದ ಮೆಣಸಿನಕಾಯಿ ಹಾಗೂ ಚಿಟಿಕೆಯಷ್ಟು ಗರಂ ಮಸಾಲ ಪುಡಿ 

ಜೋಳದ ರೊಟ್ಟಿ ಮುಟಿಗಿ ಮಾಡುವ ವಿಧಾನ:                                                                                                          ಬಿಸಿ ಬಿಸಿ ಜೋಳದ ರೊಟ್ಟಿಯನ್ನು ಸಣ್ಣ ಸಣ್ಣ ಚೂರು ಮಾಡಿಕೊಂಡು. ಆ ಬಳಿಕ ಒರಳು ಕಲ್ಲಿನಲ್ಲಿ ಉಪ್ಪು, ಒಣ ಖಾರದ ಪುಡಿ, ಬೆಳ್ಳುಳ್ಳಿ ಎಸಳು ಜೀರಿಗೆ ಹಾಗೂ ಚೂರು ಮಾಡಿದ ಜೋಳದ ರೊಟ್ಟಿ ಸೇರಿಸಿ ಚೆನ್ನಾಗಿ ಕುಟ್ಟಿಕೊಳ್ಳಿ. ನಂತರ ಇದಕ್ಕೆ ಸ್ವಲ್ಪ ತುಪ್ಪ ಈರುಳ್ಳಿ ಕೊತ್ತಂಬರಿ ಸೊಪ್ಪು ಮತ್ತು ಸ್ವಲ್ಪ ಸಣ್ಣಕೆ ಹೆಚ್ಚಿದ ಮೆಣಸಿನಕಾಯಿ ಸೇರಿಸಿ ಕುಟ್ಟಿ ಕೈಯಿಂದ ಉಂಡೆ ಕಟ್ಟಿದರೆ ರುಚಿಕರವಾದ ಜೋಳದ ಮುಟಿಗಿ ಸವಿಯಲು ಸಿದ್ದವಾಗಿರುತ್ತದೆ.