Beauty Tips : ರಾತ್ರಿ ಮಲಗುವ ಮುನ್ನ ಮುಖಕ್ಕೆ ಹಾಲಿನ ಕೆನೆ ಹಚ್ಚುವುದರಿಂದ ಏನೆಲ್ಲಾ ಉಪಯೋಗಗಳು?

Beauty Tips :

ಹಾಲಿನ ಕೆನೆ ನಿಮ್ಮ ತ್ವಚೆಯಲ್ಲಿ ತೇವಾಂಶ ಕಾಪಾಡುವ ಜೊತೆಗೆ ಕಪ್ಪು ಕಲೆಗಳನ್ನು ತೆಗೆದು ಹಾಕಲು ಸಹಾಯ ಮಾಡುತ್ತದೆ. ಚರ್ಮದ ಆರೈಕೆಗೆ ಹಾಲು ಮತ್ತು ಹಾಲಿನ ಕೆನೆ ಅತ್ಯುತ್ತಮವಾಗಿ ಕೆಲಸ ಮಾಡುತ್ತದೆ. ನಿಮಗೆ ತ್ವಚೆಯ ಆರೈಕೆಗೆ ಸಮಯವಿಲ್ಲ ವೆಂದಾದರೂ ನೀವು ರಾತ್ರಿ ಮಲಗುವ ಮುನ್ನ ಮುಖಕ್ಕೆ ಹಾಲಿನ ಕೆನೆ ಹಚ್ಚಿ ಮಲಗಬಹುದು, ಇದು ದೀರ್ಘಾವಧಿ ಮುಖದಲ್ಲಿ ಉಳಿಯುವುದರಿಂದ ಯಾವುದೇ ಅಡ್ಡಪರಿಣಾಮಗಳನ್ನು ಬೀರುವುದಿಲ್ಲ. ಇದು ಚರ್ಮಕ್ಕೆ ಸಂಬಂಧಿಸಿದ ಹಲವಾರು ಸಮಸ್ಯೆಗಳನ್ನು ಪರಿಹರಿಸುತ್ತದೆ. 

ಹಾಲಿನ ಕೆನೆಯಲ್ಲಿ ಕ್ಯಾಲ್ಸಿಯಂ, ಪ್ರೋಟೀನ್, ವಿಟಮಿನ್-ಎ, ವಿಟಮಿನ್-ಸಿ, ವಿಟಮಿನ್ ಇ, ವಿಟಮಿನ್-ಬಿ6, ಫೋಲೇಟ್, ಬಯೋಟಿನ್ ಮತ್ತು ಕೊಬ್ಬು ಸೇರಿದಂತೆ ಅನೇಕ ಪೋಷಕಾಂಶಗಳಿವೆ. ಇದು ಚರ್ಮಕ್ಕೆ ತುಂಬಾ ಪ್ರಯೋಜನಕಾರಿ. ತ್ವಚೆಯನ್ನು ಹೈಡ್ರೇಟ್ ಆಗಿ ಇಡಲು ಹಾಲಿನ ಕೆನೆ ಸಹಾಯ ಮಾಡುತ್ತದೆ. ಇದು ಲ್ಯಾಕ್ಟಿಕ್ ಆಮ್ಲವನ್ನು ಹೊಂದಿದ್ದು ಮೊಡವೆ ಮತ್ತು ಬ್ಯಾಕ್ಟೀರಿಯಾವನ್ನು ತೊಡೆದುಹಾಕಲು ಸಹಾಯ ಮಾಡುತ್ತದೆ.

ಹಾಲಿನ ಕೆನೆ ಎಲ್ಲಾ ಚರ್ಮದ ಪ್ರಕಾರದವರಿಗೂ ಸಹಾಯಕವಾಗಿದೆ. ನೀವು ಸೂಕ್ಷ್ಮ ಚರ್ಮ ಹೊಂದಿದ್ದರೂ ಹಾಲನ್ನು ಬಳಸಬಹುದು. ಚರ್ಮವನ್ನು ಸುಡುವ ಅನುಭವವಾಗುತ್ತಿದ್ದರೆ, ಅಥವಾ ಇತರೆ ತುರಿಕೆ, ಕಿರಿಕಿರಿಯನ್ನು ಅನುಭವಿಸುತ್ತಿದ್ದರೆ, ಹಾಲಿನ ಕೆನೆ ಹಚ್ಚಿದರೆ ನಿಮ್ಮ ತ್ವಚೆಯ ಸಮಸ್ಯೆ ಪರಿಹಾರವಾಗುತ್ತದೆ. ಒಣ ಚರ್ಮ ಹೊಂದಿದ್ದರೆ ಕಡಲೆಹಿಟ್ಟು ಮತ್ತು ಹಾಲಿನ ಕೆನೆಯನ್ನು ಮಿಶ್ರಣಮಾಡಿ ನಿಮ್ಮ ಮುಖ ಮತ್ತು ಕುತ್ತಿಗೆಯ ಭಾಗಕ್ಕೆ ಹಚ್ಚಿ, 15 ನಿಮಿಷ ಬಿಟ್ಟು ತೊಳೆಯಿರಿ.

ಮೊದಲಿಗೆ ಮುಖವನ್ನು ಚೆನ್ನಾಗಿ ತೊಳೆಯಬೇಕು. ನಂತರ ಮುಖವನ್ನು ಸರಿಯಾಗಿ ಒರಸಿಕೊಳ್ಳಬೇಕು. ಬಳಿಕ ಹಾಲಿನ ಕೆನೆ ಹಚ್ಚಿ. 5-6 ನಿಮಿಷಗಳ ಕಾಲ ಮುಖವನ್ನು ಮಸಾಜ್ ಮಾಡಿ. 40-45 ನಿಮಿಷಗಳ ನಂತರ ನಿಮ್ಮ ಮುಖವನ್ನು ನೀರಿನಿಂದ ತೊಳೆದುಕೊಳ್ಳಬಹುದು. ಅಥವಾ ರಾತ್ರಿ ಬಿಟ್ಟು ಬೆಳಗ್ಗೆ ಮುಖ ತೊಳೆಯಬಹುದು.

ನಿಮ್ಮ ತ್ವಚೆಯು ಕಪ್ಪಗಾಗಿದ್ದರೆ, ನಿಮ್ಮ ನಿಜ ಬಣ್ಣ ಮರುಪಡೆಯಲು ಹಾಲಿನ ಕೆನೆ ಹಚ್ಚಬಹುದು. ಹಾಲಿನ ಕೆನೆಯಲ್ಲಿ ಲ್ಯಾಕ್ಟಿಕ್ ಆಮ್ಲವಿದೆ, ಇದು ಚರ್ಮದ ಟ್ಯಾನಿಂಗ್ ಅನ್ನು ಪರಿಹರಿಸುತ್ತದೆ. ನೀವು ಮುಖಕ್ಕೆ ಹಾಲಿನ ಕೆನೆ ಹಚ್ಚುವುದರಿಂದ ಚರ್ಮದ ಬಣ್ಣವು ಸುಧಾರಿಸುತ್ತದೆ.

ಹಾಲಿನ ಕೆನೆಯ ಫೇಸ್ ಮಾಸ್ಕ್ಗಾಗಿ, ನೀವು ಒಂದು ಚಮಚ ಕೆನೆ ತೆಗೆದು ಕೊಂಡು ಅದಕ್ಕೆ ಸ್ವಲ್ಪ ಜೇನುತುಪ್ಪವನ್ನು ಸೇರಿಸಿ ಮತ್ತು ಅದನ್ನು ನಿಮ್ಮ ಮುಖದ ಮೇಲೆ ಹಚ್ಚಿ, ನಂತರ ಅದನ್ನು 20 ನಿಮಿಷಗಳ ಕಾಲ ಇರಿಸಿ ಮತ್ತು ಉಗುರು ಬೆಚ್ಚಗಿನ ನೀರಿನಿಂದ ತೊಳೆಯಿರಿ. ಕ್ಲೆನ್ಸರ್ ಮಾಡಲು ನೀವು ಒಂದು ಚಮಚ ಕೆನೆಗೆ ಒಂದು ಚಮಚ ಕಡಲೆ ಹಿಟ್ಟು ಸೇರಿಸಬೇಕು. ಈ ಮಿಶ್ರಣವನ್ನು ನಿಮ್ಮ ಮುಖಕ್ಕೆ ಹಚ್ಚಿ ನಿಧಾನವಾಗಿ ಮಸಾಜ್ ಮಾಡಿ. ನಂತರ ಬೆಚ್ಚಗಿನ ನೀರಿನಿಂದ ತೊಳೆಯಿರಿ.