Sadhu Kokila : ನಟ ಸಾಧುಕೋಕಿಲಾಗೆ ಒಲಿದ ಗೌರವ ಡಾಕ್ಟರೇಟ್...!

Sadhu Kokila : ಕನ್ನಡ ಚಿತ್ರರಂಗದ ಹೆಸರಾಂತ ಹಾಸ್ಯನಟ, ಸಂಗೀತ ನಿರ್ದೇಶಕ ಸಾಧುಕೋಕಿಲ ಅವರಿಗೆ ಡಾ. ಗಂಗೂಬಾಯಿ ಹಾನಗಲ್‌ ಸಂಗೀತ ಮತ್ತು ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲಯದಿಂದ ಗೌರವ ಡಾಕ್ಟರೇಟ್‌ ನೀಡಿ ಸನ್ಮಾನಿಸಿದ್ದಾರೆ. ಜ. 18 ರಂದು ವಿವಿಯ 7, 8 ಹಾಗೂ 9ನೇ ವಾರ್ಷಿಕ ಘಟಿಕೋತ್ಸವ ನಡೆದಿದ್ದು ಪ್ರತಿವರ್ಷ ಮೂವರಂತೆ ಒಂಬತ್ತು ಸಾಧಕರಿಗೆ 'ಗೌರವ ಡಾಕ್ಟರೇಟ್‌' ನೀಡಿದರು.

2021-22ನೇ ಸಾಲಿನಲ್ಲಿ ರಂಗಭೂಮಿ ಹಾಗೂ ಚಲನಚಿತ್ರ ನಟಿ ಗಿರಿಜಾ ಲೋಕೇಶ್‌, ಭರತನಾಟ್ಯ ಕಲಾವಿದ ಸತ್ಯನಾರಾಯಣರಾಜು ಮತ್ತು ವಿದ್ವಾನ್‌ ಸಿ.ಚೆಲುವರಾಜು, 2022-23ನೇ ಸಾಲಿನಲ್ಲಿ ಗಮಕ ವಿದ್ವಾನ್‌ ಎಂ.ಆರ್‌.ಸತ್ಯನಾರಾಯಣ, ಭರತನಾಟ್ಯ ಕಲಾವಿದೆ ಸಂಧ್ಯಾ ಪುರೆಚ, ಪ್ರದರ್ಶಕ ಕಲೆಗಳ ವಿಭಾಗದಿಂದ ಚಲನಚಿತ್ರ ನಟ, ಸಂಗೀತ ನಿರ್ದೇಶಕ ಸಾಧುಕೋಕಿಲ, 2023-24ನೇ ಸಾಲಿನಲ್ಲಿ ಹಿರಿಯ ರಂಗಕರ್ಮಿ ಸಿ.ಬಸವಲಿಂಗಯ್ಯ, ವಿದುಷಿ ವೀಣಾಮೂರ್ತಿ ವಿಜಯ ಮತ್ತು ವಿದುಷಿ ಪುಷ್ಪಾ ಶ್ರೀನಿವಾಸನ್‌ ಅವರಿಗೆ ಡಾಕ್ಟರೇಟ್ ನೀಡಿ ಪುರಸ್ಕರಿಸಿದರು.

ಈ ಕುರಿತು ನಟ ಸಾಧುಕೋಕಿಲ ಅವರು ತಮ್ಮ ಎಕ್ಸ್ ಸೋಷಿಯಲ್‌ ಮೀಡಿಯಾ ಖಾತೆಯಲ್ಲಿ ಸಂಗೀತ ಕ್ಷೇತ್ರದಲ್ಲಿನ ನನ್ನ ಸಾಧನೆ ಸೇವೆಯನ್ನು ಗುರುತಿಸಿ ಗೌರವ ಡಾಕ್ಟರೇಟ್‌ ನೀಡಿ ಪುರಸ್ಕರಿಸಿದ ಡಾ. ಗಂಗೂಬಾಯಿ ಹಾನಗಲ್‌ ಸಂಗೀತ ಮತ್ತು ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲದ ಕುಲಪತಿಗೆ ಧನ್ಯವಾದಗಳು ಎಂದು ಬರೆದುಕೊಂಡು ಪೋಸ್ಟ್‌ ಹಾಕಿಕೊಳ್ಳುವುದರ ಮೂಲಕ ಇನ್ಮುಂದೆ ಸಾಧು ನಹಿ ಡಾಕ್ಟರ್‌ ಸಾಧು ಬೊಲೊ ಎಂದು ತಮ್ಮ ಖುಷಿಯನ್ನು ವ್ಯಕ್ತಪಡಿಸಿದ್ದಾರೆ.