Belagavi : ಬಸ್‌ ಕಿಟಕಿ ಸೀಟ್‌ ಗಾಗಿ ಜಗಳ | ಯುವಕನಿಗೆ ಚಾಕು ಇರಿದು ಅಪರಿಚಿತರು ಪರಾರಿ

BELAGAVI: ಬಸ್‌ ನಲ್ಲಿ ಕೇವಲ ಕಿಟಕಿ ಪಕ್ಕದ ಆಸನಕ್ಕಾಗಿ ಜಗಳ ಶುರುವಾಗಿ ಯುವಕನಿಗೆ ಚಾಕು ಇರಿದು ದುಷ್ಕರ್ಮಿಗಳು ಪರಾರಿಯಾಗಿರುವ ಘಟನೆ ಬೆಳಗಾವಿಯಲ್ಲಿ ನಡೆದಿದೆ. ಬೆಳಗಾವಿ ಜಿಲ್ಲೆಯ ಪಂತಬಾಳೇಕುಂದ್ರಿ ಗ್ರಾಮದಿಂದ ಸಿಟಿ ಬಸ್ ಟರ್ಮಿನಲ್ (ಸಿಬಿಟಿ) ಕಡೆಗೆ ಬರುತ್ತಿದ್ದ ಕೆಎಸ್‌ಆರ್‌ಟಿಸಿ ಬಸ್‌ನಲ್ಲಿ ಈ ಘಟನೆ ಸಂಭವಿಸಿದೆ.

ಬಸ್‌ನಲ್ಲಿ ಯುವಕರಿಬ್ಬರ ನಡುವೆ ಕಿಟಕಿ ಸೀಟ್‌ಗಾಗಿ ವಾಗ್ವಾದ ಸಂಭವಿಸಿದ್ದು, ಗಲಾಟೆಗೆ ತಿರುಗಿದೆ. ಈ ವೇಳೆ ಅಪರಿಚಿತ ಯುವಕರ ಗುಂಪೊಂದು, ಮಾಜ್ ಸನದಿ (ವಯಸ್ಸು 20), ಎಂಬ ಯುವಕನ ಎದೆ ಭಾಗಕ್ಕೆ ಚಾಕು ಇರಿದು ಪರಾರಿಯಾಗಿದ್ದಾರೆ.

ಘಟನೆ ನಡೆದ ತಕ್ಷಣ ಗಾಯಾಳುವನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಬೆಳಗಾವಿ ನಗರ ಪೊಲೀಸ್‌ ಠಾಣೆಯಲ್ಲಿ ಈ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿಗಳ ಪತ್ತೆಗಾಗಿ ಬಲೆ ಬೀಸಿದ್ದಾರೆ. ಇನ್ನು ಪೊಲೀಸರು ಅಪರಿಚಿತ ಗ್ಯಾಂಗ್‌ನ ಪತ್ತೆಗೆ ಬಲೆ ಬೀಸಿದ್ದು, ಬಸ್‌ನಲ್ಲಿದ್ದ ಇತರ ಪ್ರಯಾಣಿಕರಿಂದ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಸಿಸಿಟಿವಿ ದೃಶ್ಯಾವಳಿಗಳ ಆಧಾರದಲ್ಲೂ ತನಿಖೆ ಮುಂದುವರಿಸಲಾಗಿದೆ.