Bangalore : ಶೈಕ್ಷಣಿಕ ಪಾರದರ್ಶಕತೆಗೆ ಹೊಸ ಮೈಲಿಗಲ್ಲು | BCA ಪ್ರಾಕ್ಟಿಕಲ್ ಗಳಿಗೆ ಸಂಪೂರ್ಣ ಡಿಜಿಟಲೀಕರಣ

BANGALORE : ಬೆಂಗಳೂರು ವಿಶ್ವವಿದ್ಯಾಲಯ ತನ್ನ ಇತಿಹಾಸದಲ್ಲಿ ಮೊದಲ ಬಾರಿಗೆ BCA ಪ್ರಾಕ್ಟಿಕಲ್ ಅಲಾಟ್ಮೆಂಟ್ ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ಡಿಜಿಟಲ್ ಮಾದರಿಯಲ್ಲಿ ರೂಪಿಸಿ ಶೈಕ್ಷಣಿಕ ಪಾರದರ್ಶಕತೆಯಲ್ಲಿ ಹೊಸ ಮೈಲುಗಲ್ಲು ಸ್ಥಾಪಿಸಿದೆ. ಈ ನವೀನ ಡಿಜಿಟಲೀಕರಣ ರಾಜ್ಯದ ವಿಶ್ವವಿದ್ಯಾಲಯದಲ್ಲಿಯೇ ಮೊದಲ ಪ್ರಯೋಗವಾಗಿದೆ ಎಂಬುದು ವಿಶೇಷ.

ಈ ಡಿಜಿಟಲ್ ವ್ಯವಸ್ಥೆಯ ಪ್ರಮುಖ ವೈಶಿಷ್ಟ್ಯವೆಂದರೆ ಜಿಯೋ-ಟ್ಯಾಗ್ಡ್ ಫೋಟೋಗ್ರಾಫಿ. ಈ ತಂತ್ರಜ್ಞಾನದ ಮೂಲಕ ವಿದ್ಯಾರ್ಥಿಯು ಪ್ರಾಕ್ಟಿಕಲ್ ಪರೀಕ್ಷೆಗೆ ಎಲ್ಲಿ, ಯಾವ ಸಮಯಕ್ಕೆ, ಯಾವ ಮಟ್ಟಿಗೆ ಭಾಗವಹಿಸಿದ್ದಾನೆ ಎಂಬ ಮಾಹಿತಿ ನಿಖರವಾಗಿ ದಾಖಲಾಗುತ್ತದೆ. ಇದರಿಂದ ಶಿಸ್ತು, ಪಾರದರ್ಶಕತೆ ಹಾಗೂ ಟ್ರ್ಯಾಕ್ ಮಾಡಲು ಅನುಕೂಲವಾಗುತ್ತದೆ.

ಈ ಯೋಜನೆಯ ಸಂಕಲನ ಹಾಗೂ ಕಾರ್ಯರೂಪದ ಹೊಣೆ ಡಾ. ಮುರಳೀಧರ ಬಿ.ಎಲ್‌ ಅವರದು, ಇವರು ಬೆಂಗಳೂರು ವಿವಿಯ ಕಂಪ್ಯೂಟರ್ ಸೈನ್ಸ್ ವಿಭಾಗದ ಹಿರಿಯ ಪ್ರಾಧ್ಯಾಪಕರಾಗಿದ್ದಾರೆ. ಅವರು ವಿವಿಯ ಹಳೆಯ ವಿದ್ಯಾರ್ಥಿಯಾದ ಚಿಟ್ಟಿ ಬಾಬು ಅವರ ತಾಂತ್ರಿಕ ಸಹಕಾರದಿಂದ ಈ ಸಾಫ್ಟ್ವೇರ್ ಅಭಿವೃದ್ಧಿಪಡಿಸಿದ್ದಾರೆ.

ಬೆಂಗಳೂರು ವಿವಿಯ ವ್ಯಾಪ್ತಿ ವ್ಯಾಪಕವಾಗಿದ್ದು, ದಾಬಸ್‌ ಪೇಟೆ, ನೆಲಮಂಗಲ, ಮಾಗಡಿ, ರಾಮನಗರ, ಚನ್ನಪಟ್ಟಣ, ಜಿಗಣಿ ಸೇರಿದಂತೆ 128 BCA ಕಾಲೇಜುಗಳು ಇದರ ಅಧೀನದಲ್ಲಿವೆ. ವರ್ಷಕ್ಕೆ ಸುಮಾರು 9 ಬಾರಿ ಪ್ರಾಕ್ಟಿಕಲ್ ಪರೀಕ್ಷೆಗಳನ್ನು ಆಯೋಜಿಸಬೇಕಾಗುವ ಕಾರಣದಿಂದಾಗಿ ವ್ಯವಸ್ಥಾಪನಾ ಸಂಕಷ್ಟಗಳು ಹೆಚ್ಚಾಗುತ್ತಿವೆ. ಈ ಸಮಸ್ಯೆಗೆ ಪರಿಹಾರವಾಗಿ ಈ ಡಿಜಿಟಲ್ ವ್ಯವಸ್ಥೆ ಪರಿಚಯಿಸಲಾಗಿದೆ.

ಈ ಯೋಜನೆಗೆ ಗೆಸ್ಟ್ ಫ್ಯಾಕಲ್ಟಿಗಳಾದ ಪವಿತ್ರಾ, ಕರಣ್, ಹಾಗೂ ಸಂಶೋಧನಾ ವಿದ್ಯಾರ್ಥಿಗಳಾದ ಮಾಯ ಹಾಗೂ ಸರಳ ತಮ್ಮ ತಾಂತ್ರಿಕ ಶ್ರಮ ನೀಡಿದ್ದು, ಸಾಫ್ಟ್ವೇರ್ ವಿನ್ಯಾಸದಲ್ಲಿ ಇವರ ಪಾತ್ರ ಪ್ರಮುಖವಾಗಿದೆ.

ಡಾ. ಮುರಳೀಧರ ಅವರು ಈ ವ್ಯವಸ್ಥೆಯನ್ನು ಎಲ್ಲ BCA ಕಾಲೇಜುಗಳಿಗೆ ವ್ಯಾಪಕವಾಗಿ ಜಾರಿಗೆ ತರಲು ವಿವಿಯ ಉಪಕುಲಪತಿಗಳಿಗೆ ಅಧಿಕೃತ ಪತ್ರ ನೀಡಿದ್ದಾರೆ. ಇದು ಶಿಕ್ಷಣ ಕ್ಷೇತ್ರದಲ್ಲಿ ಡಿಜಿಟಲ್ ಕ್ರಾಂತಿಯ ಹೊಸ ಅಡಿಗೆ ಹೆಜ್ಜೆ ಆಗಿದೆ.

ಈ ಪ್ರಾಯೋಗಿಕ ನಿರ್ವಹಣಾ ಮಾದರಿ ಇನ್ನುಮುಂದೆ ರಾಜ್ಯದ ಇತರ ವಿಶ್ವವಿದ್ಯಾಲಯಗಳಿಗೂ ಮಾದರಿಯಾಗುವ ಸಾಧ್ಯತೆಯಿದೆ. ಶೈಕ್ಷಣಿಕ ನಿರ್ವಹಣೆಗೆ ನವೀನ ತಂತ್ರಜ್ಞಾನ ಬಳಸುವ ಮೂಲಕ ಪಾರದರ್ಶಕತೆ, ಪರಿಣಾಮಕಾರಿತ್ವ ಮತ್ತು ವಿದ್ಯಾರ್ಥಿ ಕಲ್ಯಾಣವನ್ನು ಒತ್ತಿ ಹಿಡಿದ ಈ ಹೊಸ ಕ್ರಮಕ್ಕೆ ಶಿಕ್ಷಣ ವಲಯದಿಂದ ಪ್ರಶಂಸೆ ವ್ಯಕ್ತವಾಗುತ್ತಿದೆ.