ಭಾರತ ಸರ್ಕಾರವು ಸೆಪ್ಟೆಂಬರ್ 22, 2025 ರಿಂದ ಹೊಸ ಜಿಎಸ್ಟಿ ಸ್ಲ್ಯಾಬ್ಗಳನ್ನು ಜಾರಿಗೆ ತಂದಿದ್ದು, ದೇಶದ ವ್ಯಾಪ್ತಿಯಲ್ಲಿ 375ಕ್ಕೂ ಹೆಚ್ಚು ವಸ್ತುಗಳು ಮತ್ತು ಸೇವೆಗಳ ಮೇಲೆ ತೆರಿಗೆ ದರಗಳಲ್ಲಿ ಪ್ರಮುಖ ಬದಲಾವಣೆ ಸಂಭವಿಸಿದೆ. ಈ ನಿರ್ಧಾರದ ಮೂಲಕ ಗ್ರಾಹಕರಿಗೆ ನೇರ ಲಾಭ ನೀಡುವ ಉದ್ದೇಶವಿದ್ದು, ಕೆಲವೊಂದು ವಸ್ತುಗಳು ಅಗ್ಗವಾಗುತ್ತವೆ, ಆದರೆ ಐಷಾರಾಮಿ ಸರಕುಗಳು ಮತ್ತು ಕೆಲವು ಹೆಚ್ಚಿನ ಮೌಲ್ಯದ ವಸ್ತುಗಳಲ್ಲಿ ತೆರಿಗೆ ಏರಿಕೆ ಮುಂದುವರಿಯಲಿದೆ.
ಹೊಸ ಸ್ಲ್ಯಾಬ್ ಅನ್ವಯವಾಗಿ, ದೈನಂದಿನ ಅಗತ್ಯ ವಸ್ತುಗಳು ಅಗ್ಗವಾಗುವಂತೆ ಮಾಡಲಾಗಿದೆ. ತುಪ್ಪ, ಬೆಣ್ಣೆ, ಪನೀರ್, ನಮ್ಕೀನ್, ಜಾಮ್, ಕೆಚಪ್, ಡ್ರೈ ಫ್ರೂಟ್ಸ್, ಕಾಫಿ, ಐಸ್ಕ್ರೀಮ್, ಪಿಜ್ಜಾ ಬ್ರೆಡ್, ಪರಾಠಾ, ಹಾಲು, ಬೆಣ್ಣೆ ಚೀಸ್, ಸೂಪ್ಗಳು, ಪಾಸ್ತಾ, ಮಿಠಾಯಿಗಳು ಶೇ.12–18ರ ಮೇಲಿನ ತೆರಿಗೆ ಶೇ.5ಕ್ಕೆ ಇಳಿಸಲಾಗಿದೆ. ಜೊತೆಗೆ ಒಣಹಣ್ಣುಗಳು, ಖರ್ಜೂರ ಮತ್ತು ಸಿಟ್ರಸ್ ಹಣ್ಣುಗಳ ಮೇಲಿನ ಜಿಎಸ್ಟಿಗೂ ಶೇ.5 ರಷ್ಟು ನಿಗದಿಯಾಗಿದೆ. ಇದರಿಂದ ಗ್ರಾಹಕರಿಗೆ ದಿನನಿತ್ಯದ ಅಗತ್ಯ ವಸ್ತುಗಳಲ್ಲಿ ಹಣ ಉಳಿತಾಯವಾಗಲಿದೆ.
ಔಷಧಿಗಳು ಮತ್ತು ವೈದ್ಯಕೀಯ ಸಾಧನಗಳು ಕೂಡ ಶೇ.5 ರಷ್ಟು ಕಡಿತಗೊಂಡಿವೆ. ಔಷಧಿ ಕಂಪನಿಗಳು ಈಗಾಗಲೇ MRP ಪರಿಷ್ಕರಣೆ ಮಾಡುತ್ತಿದ್ದಂತೆ, ಬಹುತೇಕ ಔಷಧಿಗಳು, ಗ್ಲುಕೋಮೀಟರ್, ಡಯಾಗ್ನೋಸ್ಟಿಕ್ ಕಿಟ್ಗಳು, ಬ್ಯಾಂಡೇಜ್, ಥರ್ಮಾಮೀಟರ್ ಮತ್ತು ಆಮ್ಲಜನಕ ಸಾಧನಗಳ ಮೇಲಿನ ಜಿಎಸ್ಟಿ ಶೇ.12–18 ರಿಂದ ಶೇ.5ಕ್ಕೆ ಇಳಿಸಲಾಗಿದೆ. ಇದರಿಂದ ವೈದ್ಯಕೀಯ ಸಾಧನಗಳನ್ನು ಖರೀದಿಸುವುದು ಸಹ ಸುಲಭವಾಗಲಿದೆ. ಎಲ್ಲಾ ವೈಯಕ್ತಿಕ ಜೀವ ಮತ್ತು ಆರೋಗ್ಯ ವಿಮಾ ಪಾಲಿಸಿಗಳ ಮೇಲಿನ ತೆರಿಗೆಗೆ ವಿನಾಯಿತಿ ನೀಡಲಾಗಿದೆ, ಜನರಿಗೆ ಆರೋಗ್ಯ ಸಂಬಂಧಿತ ವೆಚ್ಚ ಕಡಿಮೆಯಾಗುತ್ತದೆ.
ದಿನನಿತ್ಯ ಬಳಕೆಯ ಸ್ವಚ್ಛತೆ ವಸ್ತುಗಳು ಸಹ ಅಗ್ಗವಾಗುತ್ತವೆ. ಹೇರ್ ಆಯಿಲ್, ಶಾಂಪೂ, ಟೂತ್ ಬ್ರಷ್, ಟೂತ್ ಪೇಸ್ಟ್, ಸೋಪ್, ಶೇವಿಂಗ್ ಉತ್ಪನ್ನಗಳು, ಟಾಲ್ಕಮ್ ಪೌಡರ್, ಫೇಸ್ ಪೌಡರ್, ಆಫ್ಟರ್ ಶೇವ್ ಲೋಷನ್, ಮೇಣದಬತ್ತಿಗಳು, ಬೆಂಕಿ ಪೊಟ್ಟಣಗಳು ಶೇ.5 ರ ವ್ಯಾಪ್ತಿಗೆ ಬಂದಿವೆ. ಜೊತೆಗೆ ನೋಟ್ಬುಕ್, ಪೆನ್ಸಿಲ್, ಶಾರ್ಪನರ್, ಎರೇಸರ್ಗಳಂತಹ ಸ್ಟೇಷನರಿ ವಸ್ತುಗಳ ಮೇಲೆ ಕೂಡ ಶೇ.5 ರಷ್ಟು ತೆರಿಗೆ ಅನ್ವಯವಾಗಲಿದೆ.
ವಾಹನಗಳು ಮತ್ತು ಕಟ್ಟಡ ಸಾಮಗ್ರಿಗಳು ಕೂಡ ಹೊಸ ಸ್ಲ್ಯಾಬ್ನಿಂದ ಲಾಭ ಪಡೆಯುತ್ತವೆ. ಸಿಮೆಂಟ್ ಶೇ.28 ರಿಂದ ಶೇ.18ಕ್ಕೆ ಇಳಿಸಲಾಗಿದೆ. ಟ್ರ್ಯಾಕ್ಟರ್ಗಳು, ಸೈಕಲ್ಗಳು, 350 ಸಿಸಿಗಿಂತ ಕಡಿಮೆ ಸಾಮರ್ಥ್ಯದ ಬೈಕ್ಗಳು, ಸಣ್ಣ ಕಾರುಗಳು, ಎಲೆಕ್ಟ್ರಿಕ್/ಹೈಬ್ರಿಡ್ ವಾಹನಗಳು ಮತ್ತು ಆಂಬ್ಯುಲೆನ್ಸ್ಗಳ ಮೇಲಿನ ತೆರಿಗೆ ಕಡಿಮೆಯಾಗಿದ್ದು, ಸಾರ್ವಜನಿಕರಿಗೊಂದು ನೇರ ಲಾಭವಾಗಲಿದೆ. ಅಮೃತಶಿಲೆ, ಗ್ರಾನೈಟ್ ಬ್ಲಾಕ್ಗಳು ಮತ್ತು ಪರಿಸರ ಸ್ನೇಹಿ ಕಟ್ಟಡ ಸಾಮಗ್ರಿಗಳು ಶೇ.5 ರಷ್ಟು ತೆರಿಗೆ ವ್ಯಾಪ್ತಿಗೆ ಬಂದಿವೆ.
ಆದರೆ, ಕೆಲವು ವಸ್ತುಗಳು ಮತ್ತು ಸೇವೆಗಳು ದುಬಾರಿ ಆಗುತ್ತವೆ. ಪಾನ್ ಮಸಾಲ, ಗುಟ್ಕಾ, ಜಗಿಯುವ ತಂಬಾಕು, ಸಿಗರೇಟ್, ಕಾರ್ಬೊನೇಟೆಡ್/ಏರೇಟೆಡ್ ತಂಪು ಪಾನೀಯಗಳು, ಕಾಫೀನ್ ನಿಂದ ತಯಾರಿಸಿದ ಪಾನೀಯಗಳು ಮತ್ತು ಹಣ್ಣು ಆಧಾರಿತ ಫಿಜ್ಜಿ ಪಾನೀಯಗಳ ಮೇಲೆ ಶೇ.40% ಜಿಎಸ್ಟಿ ವಿಧಿಸಲಾಗುತ್ತದೆ. ಐಷಾರಾಮಿ ಸರಕುಗಳಾದ 1200 ಸಿಸಿ/1500 ಸಿಸಿಗಿಂತ ಹೆಚ್ಚಿನ ಎಂಜಿನ್ ಹೊಂದಿರುವ ಎಸ್ಯುವಿಗಳು ಮತ್ತು ದೊಡ್ಡ ಕಾರುಗಳು, 350 ಸಿಸಿಗಿಂತ ಹೆಚ್ಚಿನ ಎಂಜಿನ್ ಹೊಂದಿರುವ ಬೈಕ್ಗಳು, ಪ್ರವಾಸಿ ಹಡಗುಗಳು, ಖಾಸಗಿ ವಿಮಾನಗಳು, ರಿವಾಲ್ವರ್ಗಳು ಮತ್ತು ಪಿಸ್ತೂಲ್ಗಳ ಮೇಲೆಯೂ ಶೇ.40% ಜಿಎಸ್ಟಿ ವಿಧಿಸಲಾಗುತ್ತದೆ. ಕಲ್ಲಿದ್ದಲು, ಲಿಗ್ನೈಟ್, ಪೀಟ್ ಮೇಲೆ ಶೇ.18%, ಡೀಸೆಲ್ ಬೆರೆಸದ ಬಯೋಡೀಸೆಲ್ ಶೇ.12% → ಶೇ.18% ಹೆಚ್ಚಿಸಲಾಗಿದೆ. 2,500 ರೂ. ಮೇಲ್ಪಟ್ಟ ಪ್ರೀಮಿಯಂ ಉಡುಪುಗಳು, ಜವಳಿ, ಹೆಚ್ಚಿನ ಮೌಲ್ಯದ ಹತ್ತಿ ಕ್ವಿಲ್ಟ್ಗಳು ಮತ್ತು ಕ್ರಾಫ್ಟ್ ಪೇಪರ್ ಶೇ.18 ರಷ್ಟು ತೆರಿಗೆ ವ್ಯಾಪ್ತಿಗೆ ಬಂದಿವೆ.
ಈ ಬದಲಾವಣೆಗಳಿಂದ ಗ್ರಾಹಕರು ದಿನನಿತ್ಯದ ವಸ್ತುಗಳಲ್ಲಿ ಹಣ ಉಳಿತಾಯ ಮಾಡಬಹುದು, ಆದರೆ ಐಷಾರಾಮಿ ಸರಕುಗಳು ಮತ್ತು ಹೆಚ್ಚಿನ ಮೌಲ್ಯದ ವಸ್ತುಗಳಲ್ಲಿ ದರ ಏರಿಕೆ ಕಂಡುಬರುತ್ತದೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಪ್ರಕಾರ, ಈ ಜಿಎಸ್ಟಿ ಸುಧಾರಣೆ ದೇಶದ ಆರ್ಥಿಕತೆಗೆ ಸುಮಾರು 2 ಲಕ್ಷ ಕೋಟಿ ರೂ. ಲಾಭ ನೀಡಲಿದೆ ಮತ್ತು ಜನರಿಗೆ ಕೈಯಲ್ಲಿ ಹೆಚ್ಚಿನ ಹಣ ಉಳಿಸಲು ನೆರವಾಗಲಿದೆ.
ಈ ಹೊಸ ಜಿಎಸ್ಟಿ ಸ್ಲ್ಯಾಬ್ನಿಂದ ಗ್ರಾಹಕರು ಯಾವ ವಸ್ತುಗಳಲ್ಲಿ ಲಾಭ ಪಡೆಯಲಿದ್ದಾರೆ ಮತ್ತು ಯಾವ ವಸ್ತುಗಳಲ್ಲಿ ಹೆಚ್ಚು ವೆಚ್ಚ ಬರುವುದೆಂಬುದರ ಮೇಲೆ ಸವಿವರ ಗಮನವಿಟ್ಟು ಖರೀದಿಯನ್ನು ಯೋಜಿಸಬಹುದು. ಈ ಕ್ರಮವು ಮಧ್ಯಮ ವರ್ಗ ಮತ್ತು ದಿನನಿತ್ಯದ ಬಳಕೆದಾರರಿಗೆ ನೇರ ಲಾಭ ನೀಡುವಂತಿದ್ದು, ವ್ಯವಹಾರಗಳಿಗಾಗಿ ಕೂಡ ಬಜೆಟ್ ನಿರ್ವಹಣೆಯಲ್ಲಿ ಸಹಾಯಕವಾಗಲಿದೆ.
About the Author
